عن المدونة... أنا وأشياء اخري
مرحبا عزيزي زائر المدونة المافيش
دا البوست التاني انا اكتبو وحاواصل اتكلم عن شوية حاجات ما قلتها في البوست الاول .انا حاليا بكتب الكلام دا بعد ساعتي ن من انشاء المدونة وحاتكلم فيو شويه عن نفسي لانو الطريقه بتاعت البروفايل ما عجبتني او ما فهمتها
انا اسمي عبد الرحمن وطالب فاينلست ولمن اجي اتكلم عن نفسي ما بعرف اقول شنو لكن بالتاكيد ما حاقول الكلام المستهلك البيقولو اي زول عن نفسو انو انا مافيني حاجه مميزه وبتاع انا مميز بي حاجات كتيره اولا انو انا شكلي غريب ودا راي معظم الناس الانا بعرفهم وكذلك طريقة تفكيري احتمال يكون في ناس شايفنها غريبة لكن انا شايفا كويسه..اخرق ومتهور وساخر ومكتئب في نفس ذات اللحظه,ثنائي القطبيه بتاع مزاجات.... وبزهج من اي حاجه تقريبا
بحب اقرا اي حاجه تقريبا من مجلة ميكي لحدي كتابات اوكتافيو باث,وبحب الافلام جدا ,كنت زمان متحمس لي تشجيع المريخ لكن الحماس دا قل والحمد لله
ما عندي اتجاه فكري وسياسي محددين وشايف انو كدا احسن لي لكن بموت في الديمقراطيه ومكسر في حقوق الانسان وكاي اي شخص سوداني طبيعي بكره الكيزان طبعا
عن المدونة زي ما قلتا المره الفاتت انا عملتها لاسباب كتيره: اهامها انو انا عايز كدا دي نمرة واحد وتاني لانو النت عموما والمدونات خصوصا بتدي مساحات رهيبة بتاعت حرية تعبير ودا الشئ المنعدم في الحياة الواقعيه في السودان
وتالتا احتمال زول ما يجي يقرا الكلام الانا بكتبو وهويستفيد منو او انا استفيد من رايو...............في الفتره الاولي حاكتب بالدراجي وعندي كم مقال جربان كدا حاجيبم عشان اتعود زايدا اقتباسات من كم حاجة كدا عاجباني عشان اتعود علي علي الفكرة بتاعت التدوين
وشكرا عزيزي زائر المدونة المافيش
No comments:
Post a Comment