من الحاجات الكويسه في الاعياد انها بتديك الفرصة انو تلاقي اكبر قدر من اصدقائك وطبعا دي حاجه بديهيه ,قبيل انا التقبت بي كميه من اصحابي حكاية بتاعت عشرة انفار كدا من مختلف الطبقات الاجتماعيه ,والمواقف الفكريه السياسيه فيهم الليبرالي والسلفي وفيهم الشايف انو (السياسه دي كلام فارغ) وفيهم الزول الما ناقش حاجه لكن عامل فاهم عشان يقشر بالموضوع ,لكن ما فيهم كوز!!المهم الناس دي اتونست في كل المواضيع تقريبا ,لكن كان للسياسة نصيب الاسج, ودي حاجه انا ملاحظ ليها في الفتره الاخيرةه دي
....المهم الجماعه اصحابي ديل ورغم اختلافات طرق تفكيرم ومستوياتم الاقتصاديه وبالتاي طريقة تعاطيهم مع الواقع السياسي والاقتصادي للسودان الا انو في حاجه واحده مشتركه بيناتم الا وهي اليأس من اي انفراج قريب في المستقبل القريب او البعيد ...وحتي الناس الشايفين انو ماف حل لي مشاكل السودان الاقتصاديه والسياسيه الا باسقاط النظام(وانا منهم طبعا) حتي ديل برضو شايفين انو نحن محتاجين زمن طويل جدا وثمن باهظ لابد من انو يتدفع حتي بعد اسقاط النظام عشان نتصلح ونبقي زي الناس ... المهم بعد القعدة دي اتسرب لي الشعور بتاع اليأس دا لكن بعد ما جيت البيكنت بقلب النت ولقيت كلام عن دولة رواند اداني امل في انو الامور ممكن تتصلح لو اتوفرت الاراده الحقيقيه ولو اتحققت الديمقراطيه طبعا
رواندا دي دولة في شرق افريقيا وتعتبر من منابع نهر النيل ... في سنة اربعه وتسعين كانت فيها ابادة جماعية بشعه جدا وتعتبر من افظع الكوارث الانسانيه ماتو فيها اكتر من تمنمية الف زول في فترة بتاعت مية يوم بس بسب حرب اهلية بين مجموعتين عرقيتين (التوتسي والهوتو) اللي الاختلاف بيناتم يكاد ينحصر في شكل الانف! مع العلم بانو العرقين ديل واحد اغلبيه والتاني اقليه ... بعد ما الحرب وقفت البلد كانت في حالة ميئوس منها تقريبا لكن بي فضل الارادة الانسانية والديمقراطية الناس ديل قدرو يتغلبوا علي مرارات الماضي ويفتحو صفحه جديده و الاهم من كدا يبنو دولة بتاعت مواطنه وقانون
تعال شوف رواندا هسي عامله كيف في خلال عشر سنه بس اتضاعف الناتج المحلي تلات مرات وبق من اكتر الدول الافريقيه جذبا للاستثمارات وهسي الخواجات بيسموها (سويسرا افريقيا) والحكومة الروانديه بتوصف بانها من اكتر الحكومات الديموقراطيه نزاهة وشفافية في افريقيا وفي سنة ت م انتخاب برلمان اغلبية اعضاءه من النساء! شفت كيف
دي كانت قصة بلد استطاعت تحقيق نهضه رهيبه في فتره بسيطه وباديين من الصفر ...فهل من مدكر؟؟؟؟؟؟؟
No comments:
Post a Comment