Sunday, October 28, 2012

ذنوبنا أم ذنوبهم؟

في حركه بتحصل كتير لمن تكون راكب حافله لما فجاة زول يفتح موضوع مع الزول الجمبو من غير ما تكون في سابق معرف في البداية الزول بيبدا يتكلم في موضوع عام  شديد كان يقول ليك انو الدنيا سخانه مثلا وما عارف الحل الوحيد الممكن تقدمو انو تتحول انت لي مكيف هوا او قطعة جليد ولي ظروف كتيره  متعلقه باي قوانين الفيزياء الموضوع دا صعب شويه !

 بدا نخش في الموضوع قبيل وانا كنت راكب في الحافله في زور عمل الحركه دي في البداية اتكلم عن السخانه وبعد داك زحمة المواصلات وفي كم زول كد بدا يتفاعل  معاو

 اها يا زول بعد داك الموضوع شوية شوية بدا يخش في الغريق  عمك عجوز هو بالمناسبه بدا يتكلم عن الظروف المعيشية الصعبه والتلتين الف البقت ما بتمشي البيت يوم واحد..ز دا غير حق الكهربا والموية .... ومصاريف الطلبه الما لاققين شغل وباقي الحاجات النحن عارفينها وعاملين رايحين دي! وانتقد_عمك كبير شويه هو بالمناسبه__ بدا ينتقد في سياسة الكيزان والسرقة والمحشوبيه وانعدام العداله الاجتماعيه  وباقي الحاجات البعملوها الجماعه ديل ونحن عارفينها وعاملين رايحين .... المهم عمك دا  اتكلم بي طريقة موضوعية جدا وبي جرأة انا احسدو عليها انا العامل فيا بتاع حريات وبكتب الكلام دا بالدس وفي مدونه مغموره,,, الزول دا زي ما قلت قبل شويه كان موضوعي جدا لكن لللاسف خيب املي في نهاية كلامو  قعد يقول لكن السبب الاساسي للمشاكل دي كترة ذنوبنا  وفسادنا الاخلاقي ... انا اندهشت واندهشت اكتر لمن عاينت ليو تاني واتاكدت انو ما شايل ليهو قزازة عرقي في يدو ولا ماسك ليهو يد عاهره  ذنوب شنو يا عمنا ياخ

 ؟؟؟؟  المهم امتصيت الصدمه وكنت داير اقول ليو  ياخي كدي راجع نفسك لو اصلو الموضوع بالذنوب كان الشقا دا من نصيب الناس الساكنين كافوري ديل موش انت وانا اللي مهما كان الحاجات الكعبه العملناها ما بتساوي واحد علي مليون من السرقة والغش وابادة المدنيين ,وكنت داير اقول عن دول بتعمل ذنوب اكتر مننا لكن عااايشه في روقه بسب التعليم الكويس والديمقراطيه والسياسات الاقتصاديه الناحجه ,,,وداير اقول ليو انو حتي في القران الكريم المم اللي ربنا انزل عليهم عذابات في الدنيا دا كان لانهم طغو واتجبروا وكفرو وفسدو فساد واضح وربنا برضو اداهم فرص كتيره ورسل ليهم رسل ذي مثلا قصة سيدنا نوح وقصة سيدنا لوط

نحن ناس مساكين يا عمنا وعلي قدر حالنا والناس ديل اتسلطوا علينا بسبب جهلنا وسكاتنا

وبسبب استخامهم السئ للايدلوجيا وبطشهم الامني  كنت داير اقول ليو كدا واكتر لكن خيب ظني لللمره التانيه لمن طقطق للكمساري ونزل من غير ما يحتج علي ذيادة تعرفة المواصلات القاطعا الكمساري من راسو ساي

 
 
 

No comments:

Post a Comment